खगेन्द्र पराजुली, गैंडाकोट, फागुन १ ।
नवलपुरमा पछिल्ला केही दिनयता विषादी सेवनका घटनामा बृद्धि भएको छ । कृषि प्रयोजनमा प्रयोग गरिने किटनाशक विषादी सेवन गरी आफैलाई प्रभावित पार्ने खालका घटनामा वृद्धि भएको पाइएको हो ।

अस्थायी प्रहरी पोष्ट वेल्डिहाका अनुसार आइतवार राती गैंडाकोट नगरपालिका वडा नं. १२ का ३५ वर्षीय एक पुरुषले तरकारी खेतीमा प्रयोग हुने लारा ९०९ विषादी सेवन गरेका हुन्।

स्थानीय यमराज महतो विष सेवनका कारण गम्भीर विरामी रहेको प्रहरीले जनाएको छ ।

दुई छोरा छोरी र एक श्रीमतीका अभिभावक महतोले किन विष सेवन गरे भन्ने विषय खुलिनसकेको प्रहरीले जनाएको छ ।

भरतपुरस्थित मनकामना अस्पतालमा यमराजको उपचार भइरहेको तर उनको स्वास्थ्य अवस्था गम्भीर रहेको अस्पताल स्रोतलाई उधृत गर्दै प्रहरीले जनाएको छ ।