चैत २१ ।
चालु आर्थिक वर्षको बितेका आठ महिनामा झण्डै साढे पाँच लाख नेपालीहरू रोजगारीका लागि बिदेसिएका छन् ।
वैदेशिक रोजगार विभागले श्रम स्वीकृति दिएको तथ्याङ्क अनुसार गएको साउनदेखि फागुनसम्म पाँच लाख ४० हजार ६ सय ८१ जना युवा रोजगारीका लागि बिदेसिएका हुन् ।
बिदेसिनेमा झण्डै चार लाख ९१ हजार ३२१ जना पुरुष रहेका छन् भने ४८ हजार ३५४ जना महिला रहेको विभागले जनाएको छ ।
नेपालीहरु यो अविधिमा संसारका विभिन्न १ सय २० देशमा बैदशिक रोजगारीमा जान श्रम स्वीकृति लिएका छन् ।
यो सङ्ख्या नयाँ र पुनः श्रम स्वीकृति लिनेको समेत हो । कोरोना महामारी अघिसम्म वैदेशिक रोजगारीमा जानेको सङ्ख्या दैनिक सरदर एक हजार जना थियो । तर पछिल्लो समय यो सङ्ख्या दोब्बरले बढेको छ । खाडीका देशसँगै केहीवर्षयता युरोप लगायतका देशमा पनि रोजगारीका लागि जाने नेपालीको सङ्ख्या बढ्न थालेको विभागले जनाएको छ ।
सरकारले संस्थागत रूपमा वैदेशिक रोजगारीमा जान १११ देश खुला गरेको छ । जसमध्ये, लिबिया, सिरिया र अफगानिस्तानमा नेपालीलाई रोजगारीमा पठाउन प्रतिबन्ध लगाएको छ ।
व्यक्तिगत रूपमा भने संसारका विभिन्न १७८ देशमा नेपालीहरू रोजगारीका लागि पुगिरहेका छन् ।