खगेन्द्र पराजुली,
नवलपुर, जेठ १३ ।
नवलपुरमा भोलिदेखि तीन दिन गणतन्त्र दिवसको अवसरमा विविध कार्यक्रम हुने भएका छन् ।
सरकारले राष्ट्रब्यापी रुपमा मनाउन लागेको दिवस जिल्लामा पनि विविध गतिविधिका साथ मनाईने जिल्ला समन्वय समिति नवलपुरले जनाएको छ ।
यस्तै, जिससले विशेष रुपमा मनाईने दिवसमा सम्पूर्ण सरकारी निजामति कर्मचारी, स्थानीय सरकारका जनप्रतिनिधि, राजनैतिक दलका समर्थक कार्यकर्ता तथा सम्पूर्ण नागरिकको सहभागिताका आग्रह समेत गरेको छ ।
भोलि आईतवार विहान डिभिजन बन कार्यालय नवलपुरको समन्वयमा बृक्षरोपणबाट दिवसको शुभारम्भ गरी भोलि आईतवारै साँझ ४ बजे जिल्ला समन्वय समिति नवलपुरको एक समूह र जिल्ला प्रशासन कार्यालय नवलपुरको अर्को समूहबीच मैत्रीपूर्ण फुटवल खेल कुमारवर्ती बहुमुखी क्याम्पसको खेल मैदानमा हुने जनाईएको छ ।
यस्तै गणतन्त्र दिवसको दिन सोमवार बिहान ७ वजे जिल्ला प्रहरी कार्यालय नवलपुर कार्यालय अगाडीबाट प्रभातफेरी निकालेर कावासोती खानेपानीको सभाहलमा औपचारिक समारोहको कार्यक्रम गरिने जनाईएको छ । सोही दिन साँझ सबै सरकारी गैर सरकारी कार्यालयमा सरसफाईसँगै दिपावली गरि दिवसलाई भब्यताका साथ मनाउन पनि भनिएको छ ।
तेस्रो दिन मंगलवार बिहान ७ बजे कावासोतीको फलफूलचोकमा नेपाल रेडक्रस सोसाईटी नवलपुरको समन्वयमा रक्तदान कार्यक्रम गरिने जिल्ला समन्वय समिति नवलपुरले जनाएको छ ।