खगेन्द्र पराजुली, नवलपुर, असार १५ ।
कावासोती १२ पिठौलीस्थित राजमन्दिरमा २० औं राष्ट्रिय धान दिवस तथा असार १५ पर्व मनाईएको छ । कावासोती १२ पिठौलीका कृषकको खेतमै दिवस मनाईएको हो ।
वडा नं. १२ को समन्वयमा मनाईएको दिवसमा वडाअध्यक्ष ध्रुव खनाल, नवलपुर एफएमका सञ्चारकर्मी, स्थानीय एवं नवलपुर जेसिज, डायमण्ड युथ क्लवका अध्यक्ष लगायतको सहभागिता रहेको थियो ।
कृषककै खेतमा उनीहरुको काम, अनुभव, समस्या, गुनासा र खुशीमा सहभागी भएर दिवस मनाउन पाउँदा कृषक हर्षित देखिन्थे ।
उल्लासमय रुपमा दिवस मनाईरहेका उनीहरुले कृषकका दुख र समस्याका गुनासा समेत ब्यक्त गर्न भ्याए । उनीहरुले मल, बीउ, सिचाई, कुलो, नहर, बोरिङ, बाढी, डुवान जस्ता प्रमुख समस्याले किसान प्रभावित भईरहेको सुनाए ।
कृषकका गुनासा सुनेका वडाअध्यक्ष खनालले केही समस्याहरु राष्ट्रिय समस्या रहेकोले केन्द्रले समाधानको बाटो खोज्नुपर्ने बताउनुभयो । सिचाई, कुलो, नहर, बोरिङ लगायतका पुर्वाधारको मर्मत, सम्भार, ब्यवस्थि तगर्ने विषयमा वडा तथा नगरको पहलमा ध्यान गईरहेको बताउनुभयो ।
गुनासा पोख्दै आफ्नै कर्ममा रमाउँदै दिवसमा सहभागी भएका किसानहरु खेतमै असारे गीतका साथै आ–आफ्ना संस्कृतिका भाका र लोकभाकामा गीत गाउँदै नाँच्दै रमाईलो गर्न समेत भ्याए । समुहमै असार १५ को सगुन दही चिउरा खाएर, एकआपसमा हिलोको टीका, बीउको जमरा लगायर उल्लासमय रुपमा दिवस मनाएका हुन् ।